>Haradinaj do ta bëjë publike kontratën me “Bechtel-Enkan”

>

Daut Haradinaj ka treguar se kolegët e tij deputetë në AAK do ta votonin për president kandidatin e partisë me të cilën nuk deshën të hynin në koalicionin qeverisës, PDK-së. Sipas tij, Jakup Krasniqi meritonte votën.

Në një intervistë për “Kohën Ditore”, deputeti Haradinaj ka treguar edhe për përgatitjet që ka bërë AAK-ja rreth denoncimit të shkeljes së Kushtetutës nga presidenti Behgjet Pacolli. Ka besim se brenda javës do të mblidhen 30 nënshkrimet e deputetëve, që janë të mjaftueshme për ta çuar në Kushtetuese çështjen. Midis deputetëve që bashkohen në iniciativë beson të jenë edhe të partive në pushtet e edhe të minoritarëve. 

Ai ka folur edhe për opozitën dhe për nevojën për unifikim të qëndrimeve që duhet të kenë subjektet që nuk janë pjesë e pushtetit. Haradinaj ka thënë se akoma nuk e njeh LDK-në e re, me të cilën duhen bashkërenduar aktivitetet, ndërsa nuk e sheh të pamundur bashkëpunimin në shumë aspekte edhe me “Vetëvendosjen”. 



Ky deputet i AAK-së ka deklaruar ta ketë kontratën e Qeverisë së Kosovës me “Bechtel&Enkan”, të cilën Qeveria nuk e ka publikuar kurrë. Premtimi i tij është se, nëse vazhdon ta mbajë fshehtë Qeveria, kopjet e kontratës do t’ia shpërndajë secilit deputet. Sipas Haradinajt, Aleanca për Ardhmërinë e Kosovës nuk do të votojë planin e Qeverisë që përmes shitjes së  PTK-së të paguhen faturat e ndërtimit të autostradës.

Në pyetjen rreth kompaktësisë së opozitës, Haradinaj  tha se në tema madhore opozita ka qëndrim të përbashkët. Natyrisht që ka dallim, edhe përbrenda opozitës, mirëpo në atë që e kemi parë, e kemi vërtetuar se përafërsisht i ndajmë mendimet e njëjta për temat madhore. Sidomos, për shembull, për zgjedhjen e presidentit opozita ishte unike, për votimin e rezolutës për negociata, po ashtu opozita është treguar se është e bashkuar, ndërsa tash për buxhetin ta shohim se si do të veprojmë. 

I pyetur pse nuk kishte opozita kandidat për president, Daut Haradinaj u përgjigj se ishte negociuar edhe brenda në parti për kandidaturën e Ahmet Isufit. Ahmeti nuk ka pranuar, edhe mendoj që ka pasur të drejtë që s’ka pranuar dhe, në anën tjetër, aty është dashur partia më e madhe opozitare ta bjerë një kandidat, në këtë rast LDK-ja. Mendoj që ka qenë veprim i gabuar që s’kemi dalë me kandidat. 


Ai nuk e ka mohuar se mund të mbështetej edhe kandidatura e Jakup Krasniqit. Sinqerisht ju them që Aleanca ka pasur qëndrim bajagi pozitiv rreth Jakup Krasniqit për kandidat për president. Z. Krasniqi ka dëshmuar bajagi një lidership të kujdesshëm në këto rrethanat gjashtëmujore, sa ishte ushtrues detyre i presidentit.
 Do ta kishim mbështetur, besoj. 


Për rolin opozitar të LDK-së  Haradinaj u shpreh se kjo tanika një frymë të re tashmë në Parlament. Mendoj që LDK-ja me emrat që i ka shti në Parlament, ka mundësi për të punuar bashkë me Aleancën dhe me “Vetëvendosjen”. Ta shohim në të ardhmen se si do të veprojë brenda në Kuvend, për shkak se janë emra shumë të rinj dhe akoma nuk i njohim mirë.
Por nuk ishte i prerë nëse bashkë me LDK-në do të mund të adresonin në Gjykatën Kushtetuese një kërkesë për shqyrtimin nëse u shkel  Kushtetuta me votën për qeverinë të Behgjet Pacollit. 


Daut Haradinaj, në intervistën për “ohën Ditore” është shprehur se AAK do ta votojë buxhetin nëse ai përmban rritjen e pagave, atë që e ka premtuar kryeministri dhe atë që e ka bërë marrëveshje. Sa e kam lexuar dhe sa e kam kuptuar buxhetin unë, është rritur për 72 milionë fondi i pagave, që nënkupton se është rreth 23 për qind rritja e pagave. 



Por, duke e pasur parasysh se ai ka bërë një marrëveshje me laramani dhe nuk e ka marrë një qëndrim se do të rriten pagat, ta marrim shembull, 50 për qind, por për mësues 50 për qind, për mjekë 30 për qind, për administratën 27 për qind, nëse s’gaboj. Kjo është laramani dhe ne do të kërkojmë dhe do të insistojmë që ky ta mbajë premtimin, sepse ne besojmë se ky i ka marrë votat edhe mbi atë premtim. 


Do ta votojmë nëse do të rriten rrogat 50 për qind, siç ka premtuar. 
I pyetur se a do ta mbështesë AAK-ja shitjen e Postës, Haradinaj u përgjigj se ajo është aset nacional.  Nuk guxon të shitet Posta në këto rrethana. Unë mendoj që duhet të jenë aksionet minimum 51 për qind që duhet t’i mbajë Qeveria e Kosovës ose shteti. Domethënë, të shiten një pjesë e aksioneve, e jo që Posta t’i jepet komplet, ndërsa prapë kushti ynë është që vlera të jetë sa më e lartë, e jo në këto rrethana që po përmenden shifra të caktuara që kërkohen fonde për pagesat e “Bechtel&Enkas”. 


Daut Haradinja thotë se ka në dorë kontratën me “Bechtel-Enkan”
Unë mendoj që është një kontratë jo e mirë e që është në disfavor të Kosovës  e të buxhetit, pohon ai. Haradinaj nuk përmendi nga e ka këtë kontratë. 


Nuk dua të përmend emra. Kjo kontratë nuk është ilegale. Buxheti i Kosovës paguan miliona euro dhe besoj që këtë kontratë do ta bëjë publike edhe vetë Qeveria. Në kontratë nuk figurojnë elementet kryesore, por specifikohen gjërat vetëm në vija të trasha.
I pyetur se pse kishte thënë fjalë të mira për Limajn, Haradinaj tha se 
nuk kanë qenë fjalë të mira. Kam deklaruar që niveli i autoudhës i ka tejkaluar nivelet e një ministri. Kur të kalon shuma prej 1 miliard eurosh nuk mund të jetë vendim i një ministri, por i kryeministrit. 


Z. Limaj i ka tre vjet që nuk ka folur me mua.  Hera e parë që e shoh pas kaq shumë kohe ishte në Parlament. Por, megjithatë kjo i mbetet atij. Unë po flas që asetet e kësaj kontrate janë të nivelit që i kapërcejnë kornizat e një ministri apo të disa ministrave dhe shkon deri në nivelin e kryeministrit.


Haradinaj posaçërisht ia hedh fajin kryeministrit për kontratën e dëmshme me  “Bechtelin” . “Qeveria e kryeministri kanë kërkuar mbështetje nga instancat ndërkombëtare, kanë kërkuar ekspertiza, çka është logjike të bëhet një gjë e tillë. Por, kryeministri është implikuar drejtpërdrejt në punën e kësaj kontrate”, ka thënë Haradinaj./kn

Postuar te KOSOVË. Komentet te >Haradinaj do ta bëjë publike kontratën me “Bechtel-Enkan” Janë të Mbyllura

>Krasniqi: OJQ-të nuk mund t’i rrëzojnë vëllezërit e Gadafit

>

Lëvizja Vetëvendosje nuk ka qenë pjesë e të ashtuquajturit plan për rrëzimin e Qeverisë dhe të presidentit të Kosovës, por ky plan për këtë subjekt është një farsë që është bërë me popullin e Kosovës.

Duke i quajtur presidentin dhe kryeministri si vëllezër të liderit libian Moamer Gadaff, deputeti i Lëvizjes Vetëvendosje, Florin Krasniqi ka thënë se nuk munden OJQ-të ta rrëzojnë këtë qeveri dhe këtë president.
Postuar te Bota, KOSOVË. Komentet te >Krasniqi: OJQ-të nuk mund t’i rrëzojnë vëllezërit e Gadafit Janë të Mbyllura

>Vala dhe Ipko regjistruan ‏mbi 1 milion konsumatorë

>

Prishtinë, 15 mars – Operatori publik VALA dhe kompania IPKO, po  vazhdojnë regjistrimet e numrave mobil. Deri më tani janë regjistruar  mbi 1 milion e 100 mijë numra mobil.
Zëdhënësi i Postë Telekomit të Kosovës (PTK), Menduh Abazi, ka bërë të ditur për portalin Qendra.info, se VALA deri më tani ka arritur t’i regjistroj mbi 800 mijë numra. 


VALA deri në përfundim të afatit ligjor, shpreson se do të arrijmë të përmbyllim numrin e përgjithshëm të të gjithë konsumatorëve tanë të cilët posedojnë numra të VALA-s, ku deri më tash kemi arritur t’i regjistrojmë mbi 800 mijë numra.”, ka thënë Menduh Abazi. 


Edhe Zana Bejta, Këshilltare Ligjore në kompaninë IPKO është shprehur për Qendra.info, se IPKO ka investuar të gjitha resurset e nevojshme njerëzore dhe financiare, me qëllim që ky proces të kalojë lehtë dhe pa probleme për konsumatorët. “Deri më sot, ne kemi arritur që të regjistrojmë mbi 275 mijë konsumatorë, ndërsa pas shtyrjes së afatit nga Autoritetit Rregullativ i Telekomunikacionit deri më 31 mars 2011, në besojmë që do të arrijmë t’i regjistrojmë të gjithë konsumatorët ekzistues si dhe ata të rinj”, ka thënë ai.


 Lidhur me regjistrimin e konsumatorëve të saj, kompania IPKO ka lansuar edhe një lojë shpërblyese për të gjithë konsumatorët e saj të telefonisë mobile, duke përfshirë edhe ata që tashmë nuk e kanë regjistruar numrin e tyre mobil. “Me këtë lojë shpërblyese, telefonia mobile IPKO çdo ditë i shpërblen 50 konsumatorë me nga 100 minuta kohë bisede brenda rrjetit të saj, ndërsa në baza ditore jep edhe dy telefona mobil Nokia. Përzgjedhja e fituesve të lojës shpërblyese bëhet në mënyrë automatike”, ka deklaruar për Qendra.info.

Postuar te KOSOVË. Komentet te >Vala dhe Ipko regjistruan ‏mbi 1 milion konsumatorë Janë të Mbyllura

>Presidenti Pacolli kërkon që eprorët e FSK-së të shkollohen në akademitë ushtarake të NATO-s

>


Presidenti i Republikës së Kosovës, Behgjet Pacolli priti sot në takim admiralin Samuel J. Locklear, komandant i Forcave të Bashkuara të NATO-s në Napoli, i cili shoqërohej nga komandanti i trupave të KFOR-it, gjenerali Erhard Buhler.

Presidenti Pacolli ka falënderuar admiralin Locklear për gjithë kontributin që NATO ka dhënë dhe po jep në vazhdimësi për popullin e Kosovës, me theks të veçantë në ndihmën e vazhdueshme për trajnimin dhe profesionalizimin e Forcave të Sigurisë së Kosovës (FSK). Në këtë plan, ai ka kërkuar që eprorët e FSK-së të shkollohen në akademitë e ndryshme ushtarake të NATO-s.

Gjithashtu, Presidenti Pacolli ka përsëritur kërkesën që pjesëtarët e FSK-së të jenë pjesë e misioneve paqësore në botë, në kuadër të NATO-s, kudo ku kjo shihet e nevojshme.

Në një deklaratë bërë pas takimit, Presidenti Pacolli theksoi se nga admirali Samuel J. Locklear ka marrë “çdo garanci që NATO do të jetë pjesë e halleve të qytetarëve të Kosovës, NATO do të ndihmojë Forcat e Sigurisë së Kosovës, që të përgatisin ato dhe në të ardhmen të rrugëtojmë bashkë me to”.

“Nga ana ime shpreha gatishmërinë e bashkëpunimit pa limite me NATO-në, e sidomos me KFOR-in këtu në Kosovë, shpreha falënderimet e popullit të Kosovës dhe të miat personale për këtë çka KFOR-i është duke bërë për Kosovën në drejtim të përgatitjes të Forcës së Sigurisë së Kosovës për të rrugëtuar së bashku në të ardhmen në shtëpinë e madhe të NATO-s”, tha ai.

Presidenti Pacolli ka folur edhe për rolin e pranisë së trupave të KFOR-it në Kosovë, që është një prani shumë e rëndësishme dhe për të cilën qytetarët e Kosovës kanë një admirim dhe respekt të pakufishëm.

Ai gjithashtu ka folur edhe reduktimin e trupave të KFOR-it, duke shtuar se krahas zvogëlimit të trupave është shtuar kualiteti i tyre i veprimit, ndërkohë që vetë zvogëlimi i këtyre trupave është shenjë e gjendjes stabile në vend, por edhe i rritjes së kapaciteteve të Forcës së Sigurisë së Kosovës dhe Policisë së Kosovës.

Komandanti i Forcave të Bashkuara të NATO-s në Napoli, admirali Samuel J. Locklear, pasi ka uruar Presidentin Pacolli për zgjedhjen në detyrën e re, ka theksuar se gjatë gjashtë muajve të fundit ka qenë disa herë në Kosovë dhe ka vërejtur gjatë kësaj periudhe një varg ndryshimesh pozitive.

“Kosova dhe NATO kanë bërë një rrugë të gjatë bashkë dhe do ta vazhdojnë këtë rrugëtim”, tha ai.

Ndërsa, duke folur për zvogëlimin e trupave të KFOR-it, admirali Samuel J. Locklear tha se “ky zvogëlim nuk e zvogëlon rëndësinë e KFOR-it në Kosovë”.

Ndërlidhur me Forcën e Sigurisë së Kosovës, admirali Locklear theksoi se në periudhën e ardhshme do të bëhet vlerësimi i përmbushjes së kapaciteteve të plota operative të kësaj force./topLajm






Postuar te KOSOVË, POLITIKË. Komentet te >Presidenti Pacolli kërkon që eprorët e FSK-së të shkollohen në akademitë ushtarake të NATO-s Janë të Mbyllura

>“Express” “zbulon” komplotin kundër pushtetit

>

Klubi për Politikë të Jashtme ka provuar të organizojë demonstrata kundër institucioneve të Kosovës. Zyrtarë të KPJ-së nuk e mohojnë se një nga qëllimet ka qenë edhe rrëzimi i pushtetit. Ata hartuan edhe Planin e Veprimit. Kishte koordinim edhe me opozitën. 

Por, Plani u refuzua nga shumica e OJQ-ve. Hashim Thaçi tha se pushteti nuk mund të merret me dhunë, e as të uzurpohet, pohon e përditshmja e Prishtinës, “Express”, shkrim të cilin po e transmetojmë në tërësi, për analogji me kohët e konspiracioneve të sistemit totalitar. 

Sipas kësaj gazeta, Klubi për Politikë të Jashtme (KPJ) i Veton Surroit përveç si kritikues i ashpër ndaj pushtetit në Kosovë, javëve të fundit ka hartuar plane konkrete për demonstrata që, si qëllim final, do të kishin edhe rrëzimin e koalicionit qeverisës.

Pas një diskutimi joformal mes pjesëtarëve të KPJ-së dhe disa OJQ-ve, më 3 mars është mbajtur një takim i përfaqësuesve të disa OJQ-ve. Takimi është ftuar nga Hajrulla Çeku, hulumtues në Klubin për Politikë të Jashtme dhe është mbajtur në zyrat e Fondacionit Kosovar për Shoqëri Civile (KSCF) në Prishtinë.

Menjëherë pas takimit, Çeku nëpërmjet një e-maili u dërgon dhjetëra OJQ-ve një Plan të Veprimit, në të cilin janë propozuar hollësisht hapat që duhet ndërmarrë shoqëria civile “për shprehjen e organizuar të pakënaqësisë dhe mospajtimit qytetar me zhvillimet e fundit politike, të cilat e shkelin vullnetin qytetar dhe kushtetutën e vendit”.

Në bazë të një komunikimi me e-mail dhe dokumentit të quajtur Plani i Veprimit, të cilat i ka siguruar gazeta Express, mund të kuptohet se plani është hartuar në Klubin për Politikë të Jashtme dhe u është servuar si i gatshëm OJQ-ve dhe individëve tjerë.
Me plan ishin paraparë hollësisht aktivitetet që është dashur të fillojnë më 7 mars. Gjithçka do të përfundonte më 20 mars, me protestën e madhe para Qeverisë.

“Gjatë fushatës, organizatat e involvuara do të ndërmarrin veprimet e mëposhtme, por nuk do të kufizohen vetëm me to: protesta ditore, shkrime në gazeta, deklarata të përbashkëta publike, konferenca për media, dekonstruktim i ngjarjeve, takime mobilizuese me OJQ-të nëpër komuna të tjera, takime mobilizuese me sindikatat e punës, takime mobilizuese me studentët, performansa artistike, debate televizive, grupi në Facebook, posterët dhe fllajerët, protesta e madhe”, thuhet në preambulën e Planit të Veprimit që mban titullin “Fushatë e shoqërisë civile për integritet të institucioneve shtetërore”.

Mediumi i parë që e ka botuar këtë plan është portali qendra.info, të shtunën.
Por, shumica e OJQ-ve nuk iu përgjigjen ftesës së KPJ-së, ndërkaq ato pak OJQ që morën pjesë nuk u bindën që të bëhen pjesë e Planit të Klubit që, pa u konsultuar me ta, ua kishte përcaktuar rolet dhe detyrat, hollësisht.

Për këtë nismë kundër institucioneve të Kosovës ka pasur konsultime dhe koordinim edhe me parti opozitare. Kjo mund të kuptohet qartë nga e-maili i Ramadan Ilazit, i Lëvizjes FOL. Ilazi fillimisht refuzon pjesëmarrjen e OJQ-së së tij në demonstrata, por ai tregon se kur është debatuar për nismën për demonstrata, është përmendur edhe një bashkërendim dhe koordinim me parti politike.

“Ne mendojmë se aktivitetet e shoqërisë civile, sidomos kur organizohen në koalicion, nuk duhet të bashkërendohen dhe koordinohen me partitë politike, sepse kjo rrezikon të dëmtojë kredibilitetin e çfarëdo nisme që mund pastaj të quhet e shoqërisë civile”, shkruan Ramadan Ilazi në e-mailin e tij, më 7 mars.

Nga iniciativa e KPJ-së tërhiqet edhe organizata joqeveritare “Syri i Vizionit”.
Mungesa e përkrahjes nga shoqëria civile detyron Klubin për Politikë të Jashtme që të pranojë dështimin e nismës për demonstrata dhe fushatë kundër institucioneve.
Kjo konfirmohet në e-mailin e hulumtuesit të KPJ-së, Hajrulla Çeku, i shkruar më 7 mars, ditën kur ishte planifikuar të nisë zbatimi i planit.

“Pas takimit të sotëm ku morën pjesë një numër i vogël i organizatave, si dhe pas deklarimeve të disa organizatave të tjera përmes e-mailit, mendojmë se duhet te tërhiqet propozimi për veprimin e shoqërisë civile në bazë të planit të veprimit që u qarkullua ditëve të fundit brenda këtij grupi të organizatave. Arsyeja kryesore është mungesa e energjisë së domosdoshme brenda këtij grupi të organizatave për të reaguar dhe vepruar ndaj dëmtimit të integritetit të institucioneve shtetërore të Kosovës dhe jo vetëm”.

Çeku shpreh mospajtim për vendimin refuzues të kolegëve të tij nga shoqëria civile.
“Ne në KPJ mendojmë që detyra primare e shoqërisë civile është mbrojtja e parimësisë dhe interesit publik, e sidomos në rastet kur ka shkelje brutale të parimeve të demokracisë (e këtë parim OJQ-të e kanë të kodifikuar në misionet e tyre). Për më tepër, besojmë që veprimtaria e OJQ-ve nuk duhet të orientohet kah sigurimi i balanceve politike, ngase ky balancim do të nënkuptojë anësi politike dhe jo e kundërta”, shkruan ai.

E-maili i pjesëtarit të KPJ-së përfundon në mënyrë ironike.

“Ju urojmë të gjithë të mirat në shijimin e privilegjeve, rehatisë dhe të mirave të tjera që mund të ju sjellë veprimtaria në kuadër të shoqërisë civile”.

Qëllimi final

Hajrulla Çeku, hulumtues në Klubin për Politikë të Jashtme, ka konfirmuar të dielën për Express se ai është ndër iniciatorët dhe autorët kryesorë në KPJ, që hartoi Planin e Veprimit.

“Dokumenti në fjalë është një draft, i cili është në përpunim. Nuk ka qenë kurrfarë dokumenti i finalizuar rreth të cilit janë marrë vesh organizatat. Ka qenë një draft të cilin e kam dërguar unë me e-mailin tim, në një numër të madh të organizatave. Aty, në atë dokument, ku përmenden emrat e disa individëve e organizatave, kanë qenë propozime që kanë dalë gjatë hartimit të planit nga disa organizata. Aty ka njerëz që nuk janë konsultuar ende, sepse nuk kemi mbërritur ende në atë fazën e implementimit të planit, sepse diskutimet vazhdojnë”, tha Çeku.

“Kjo nuk është iniciativë e një organizate, por dikush është dashur ta shkruaj atë plan të veprimit dhe atë e kemi shkruar ne, gjegjësisht unë dhe pastaj është plotësuar”, ka shtuar ai.

Çeku është hartuesi i planit, por thotë se ka përfshirë edhe idetë e të tjerëve, të cilët nuk i përmend me emër.

“Një prej atyre që janë të involvuar për me e shty vullnetshëm këtë punë përpara është Klubi për Politikë të Jashtme. Fakti që unë e kam dërguar e-mailin, nuk më klasifikon automatikisht si iniciator të idesë së të tjerëve, sepse aty ka ide të të tjerëve. Por në këtë nivel të planit të veprimit, atë e kam bërë unë”, ka thënë ai.

Zyrtari i KPJ’së thotë se plani nuk është diçka e pazakonshme, sepse “këto janë lëvizje normale që i bën shoqëria civile”.

I pyetur se a është qëllimi final i Planit edhe rrëzimi i institucioneve, Çeku u përgjigj: “Paj, nëse në një moment evidentohet që integriteti, ta zëmë, i institucionit të Presidentit është dëmtuar deri në atë nivel, që duhet me u rizgjedhë Presidenti, po, edhe ajo kish me qenë njëra prej kërkesave. Por edhe për zgjedhje të jashtëzakonshme. Edhe për këtë opsion jemi të hapur. Por, nuk kemi mbërritur në atë fazë të konkretizimeve, sepse plani ende nuk është miratuar. Ai është ende i hapur për diskutim”.

Pushteti nuk merret me dhunë

Kryeministri Hashim Thaçi tha të mos jetë në dijeni për planin e KPJ-së, por theksoi se askush nuk duhet të pretendojë të marrë pushtetin me dhunë, sepse këtë nuk do ta lejonte populli i Kosovës. Ai i bëri këto komente në Aeroportin ‘Adem Jashari’, të dielën, pak para nisjes për një vizitë në Turqi.

“Unë nuk jam në dijeni, por jam në favor të kultivimit të ideve, projekteve, alternativave dhe fuqizimit të institucioneve legjitime të Kosovës, prandaj qytetarët i kanë zgjedhur institucionet me vullnetin e tyre, edhe Qeverinë, edhe të gjitha institucionet. Natyrisht, edhe partitë opozitare. Vullneti i qytetarëve duhet të respektohet nga të gjithë, prandaj duhet të respektohet legjitimiteti dhe assesi të pretendojë ndokush përmes dhunës të uzurpojë apo të marrë pushtet. Diçka të tillë nuk pranon populli i Kosovës dhe as bota demokratike”, ka thënë Thaçi.

Ai deklaroi se demokracia i ka rregullat e veta të pjesëmarrjes në proces dhe besimit nga elektorati, nga qytetarët dhe jo të rrënimit apo pretendimit të dhunës ndaj institucioneve. “Diçka të tillë, qytetari i Kosovës nuk ka pranuar kurrë dhe nuk do ta pranojë as në të ardhmen, nuk do ta pranojë as bota demokratike, as Shtetet e Bashkuara të Amerikës, as Bashkimi Evropian”.

Ai shtoi se nuk është mirë që shembuj të përcjellë në vendet përreth Kosovës, të barten në Prishtinë. “Dhe, diçka të tillë jam i bindur që qytetarët e Kosovës nuk do të lejojnë të ndodhë”, ka theksuar Thaçi./kn

Postuar te KOSOVË, POLITIKË. Komentet te >“Express” “zbulon” komplotin kundër pushtetit Janë të Mbyllura

>Pacolli premton njohje nga Afrika dhe Lindja e Mesme

>

Kosovën së shpejti pritet ta njohin vende nga kontinente dhe rajone të ndryshme të botës. Ky premtim vjen nga presidenti i Kosovës, Behgjet Pacolli, sipas të cilit, njohje të reja do të ketë nga shtete të Afrikës dhe Lindjes së Mesme.
Gjatë një takimi që pati të hënën me kryetaren e KQZ-së, Valdete Daka, Pacolli ka thënë se mungesa e njohjeve të reja gjatë kësaj kohe, ka qenë për shkak të një vakuumi institucional.


Por, pavarësisht kësaj, Pacolli ka vlerësuar se “edhe gjatë asaj kohe, ka pasur njohje të shtetësisë së Kosovës”, raportoi Zëri.
Pacolli ka thënë se me ministrin e Punëve të Jashtme, Enver Hoxhaj, do të zbatohet një program që përshpejton procesin e njohjeve, ndërsa ka theksuar se ekipet e tij lobuese ende janë duke punuar në këtë drejtim, duke mos hezituar të përmend edhe kontinentet dhe rajonet prej nga pritet të vijnë njohjet e reja.


“Tani bashkë me ministrin e Punëve të Jashtme kemi biseduar, do të bisedojmë prapë për implementimin e një programit diplomatik, që e kemi në definim e sipër, program ky që do të jetë shumë inovativ dhe besoj se do të përshpejton arritjen e njohjeve”, ka thënë presidenti Pacolli./tg

Postuar te KOSOVË, POLITIKË. Komentet te >Pacolli premton njohje nga Afrika dhe Lindja e Mesme Janë të Mbyllura

>Turqia angazhohet për njohjen e shtetit të Kosovës

>

Në kuadër të Samitit Botëror të Liderëve të Ndryshimeve, kryeministri i Kosovës, Hashim Thaçi ka zhvilluar një takim me kryeministrin e Turqisë, Rexhep Taip Erdogan.
Kryeministri turk ka premtuar angazhimin e Turqisë për të siguruar njohje të reja për shtetin e Kosovës.

Thaçi ka shprehur mirënjohjen për mbështetjen që i ka dhënë Turqia Kosovës në procesin e çlirimit, pavarësimit dhe të zhvillimit, duke theksuar mbështetjen e vazhdueshme të Turqisë në procesin e njohjeve të Kosoëvs dhe investimet turke në Kosovë.

Postuar te Bota, KOSOVË, POLITIKË. Komentet te >Turqia angazhohet për njohjen e shtetit të Kosovës Janë të Mbyllura

>Presidenti Pacolli ftohet për vizitë në Itali

>

Presidenti i Republikës së Italisë, Giorgio Napolitano i ka dërguar një ftesë zyrtare Presidentit të Republikës së Kosovës, Behgjet Pacolli për të vizituar këtë shtet, bëhet e ditur përmes një njoftimi nga Presidenca.
Presidenti Pacolli, sipas njoftimit, do të takohet me Presidentin Napolitano. Ai gjithashtu do të marrë pjesë në ceremoninë zyrtare të 150 vjetorit të formimit të Italisë së bashkuar, që do të mbahet më 2 qershor në Romë.

“Prania Juaj do të ishte një nder për mua e për Qeverisë Italiane dhe do të përbënte një dëshmi të re domethënëse të lidhjeve të forta të miqësisë që bashkojnë Kosovën e Italinë. Me shpresën se shumë shpejt do t’ju takoj në Romë, kam kënaqësinë t’ju shpreh përshëndetjet e mia më të përzemërta”, shkruan ndër të tjera në ftesën e tij Presidenti i Italisë, Giorgio Napolitano.

Presidenti Pacolli e ka pranuar më kënaqësi ftesën e dorëzuar nga ambasadori i Italisë në vendin tonë, z.Michael Giffoni. 

Gjatë vizitës në Romë, Presidenti Pacolli do të realizojë takime edhe me zyrtarë të tjerë të lartë të shtetit italian, me komunitetin e biznesit dhe takime të tjera./kn

Postuar te KOSOVË, POLITIKË. Komentet te >Presidenti Pacolli ftohet për vizitë në Itali Janë të Mbyllura

>Një shqiptar arrestohet lidhur me vrasjen e Leutrim Musliut

>

Lidhur me vrasjen e 14-vjeçarit Leutrim Musliu në pasditën e 5 marsit, Policia e Kosovës në Gjilan ka arrestuar të premtën mbrëma një person nga fshati Uglar, vendbanim i banuar vetëm me shqiptarë. 

Burime të PK-së në Gjilan dhe Prokurorisë së Qarkut i kanë thënë të shtunën KD-së se personi i arrestuar është i moshës madhore, midis 40-50 vjeç, dhe i njohur edhe më herët për Policinë e Gjilanit. “I dyshuari, shqiptar nga Uglari, mbi 40-vjeç, është arrestuar dhe është ndaluar në mbajtje për 48 orë lidhur me rastin e vrasjes së 14-vjeçarit, Leutrim Musliu nga Uglari”, kanë thënë burime të Policisë dhe Prokurorisë Publike të Qarkut në Gjilan, të shtunën.

Siç dihet, lidhur me rastin e vrasjes në Uglar, Policia e Gjilanit ka arrestuar dy serbë nga Pasjani, Zh.S. (1967) dhe S.A. (1964), ky i fundit është vetëdorëzuar në Stacionin e Policisë në Gjilan, pasi gjatë bastisjes së shtëpisë së tij ai nuk ishte gjendur aty. Për rastin e vrasjes së 14-vjeçarit nga Uglari janë bastisur tri shtëpi në Pasjan, ndërsa në kërkim është edhe një serb nga fshati Pasjan, M. K (1967), i cili në ditën e bastisjes së shtëppisë së tij nuk ndodhej në shtëpi. 



Dy të arrestuarit serbë nga Pasjani tashmë janë liruar, siç është thënë, për mungesë provash, ndërsa në ndalje prej 48 orësh është shqiptari nga Uglari, i arrestuar të premten mbrëma. Burime nga Prokuroria e Qarkut në Gjilan kanë thënë se tashmë kanë nisur hetimet ndaj shqiptarit me vendbanim në Uglar, të arrestuar një ditë më herët, ndërsa nuk janë ndërprerë hetimet as ndaj serbëve nga Pasjani, të cilët kanë qenë të ndaluar, por tashmë janë lënë të lirë./kn

Postuar te KOSOVË. Komentet te >Një shqiptar arrestohet lidhur me vrasjen e Leutrim Musliut Janë të Mbyllura

>QKUK: Dyshime për korrupsion

>

Në Qendrën Klinike Universitare të Kosovës ka shumë keqpërdorime të parasë publike dhe korrupsion, thonë vetë zyrtarë të sistemit shëndetësor. 
Deri tani, sipas sekretarit permanent në Ministrinë e Shëndetësisë, Ilir Tolaj, ka pasur ndjekje penale dhe vendimeve të gjykatave, por kanë qenë vetëm për raste minore, derisa shumat e mëdha të parave të keqpërdorura, asnjëherë nuk janë hetuar.

”Po aq sa janë të korruptuara sistemet tjera, po aq është e korruptuar edhe Qendra Klinike. Në QKUK nga paslufta deri tash ka pasur dështime shumë më të mëdha në shfrytëzimin e parasë publike që në prapavijë kanë korrupsionin dhe përfitimin e jashtëligjshëm dhe për to askush nuk është përgjigjur asnjëherë”, thotë Tolaj.

Por, Tolaj shton se njëri nga rastet e dyshimta korruptive brenda Qendrës Klinike Universitare, është edhe Instituti i Onkologjisë. Ky objekt ka filluar të ndërtohet në vitin 2004 dhe ende s’është funksionalizuar.

Në këtë objekt janë shpenzuar miliona euro dhe kjo bën që dyshimi të jetë i bazuar se në projektet e mëdha, elementet korruptive janë evidente.

”Prej kohës kur unë jam në detyrën e sekretarit, tashmë e kam bërë një padi për mashtrim të përmasave madhore të kryer në ministri, dhe jemi në përgatitje të disa rasteve që përfshijnë edhe aktivitete të caktuara në QKUK dhe së shpejti edhe ato do të bëhen të ditura. Burimet e këtyre informatave janë të llojllojshme, si p.sh, ajo faktike, objekti i Onkologjisë është një objekt i ndërtuar pa leje, pa plan, e pafunksionalizuar dhe na obligon të ndërmarrim një vendim të tillë”, shpjegon Tolaj.

Në anën tjetër, ushtruesi i detyrës së drejtorit në QKUK, Lulzim Emini, shprehet skeptik të ketë korrupsion brenda këtij institucioni.

”Përgjigja mund të jetë relative, sepse në bazë të informatave që ne disponojmë, në QKUK nuk ka korrupsion”, deklaron Emini.

Sipas Eminit, mekanizmi i vetëm që të luftohet korrupsioni është që pacientët të ankohen dhe të paraqesin rastet në kutitë anonime.

”Në QKUK janë kutitë e ankesave, ku pacientët tanë, por edhe përcjellësit e tyre, kanë mundësi të vendosin ankesa anonime për keqpërdorimet e mundshme, që nga kushtet jo të mira, e deri të dhënia e mitos. Por, pacientët asnjëherë nuk kanë pasur ankesa të tilla, përpos ankesave për ngritjen e cilësisë së ushqimit”, thekson Emini.

Ndërkaq, Lorik Bajrami nga organizata “Çohu”, organizatë kjo që merret me luftimin e korrupsionit, thotë se brenda Qendrës Klinike Universitare, korrupsioni është njëri nga elementet kryesore që e ka bërë këtë institucion të funksionojë në mënyrë shumë të dobët.

”Korrupsioni është një prej problemeve kyçe që sistemin shëndetësor e ka bërë të funksionojë në mënyrën siç funksionon – në mënyrë shumë të dobët dhe në kualitetin e shërbimeve që ata i ofrojnë. Kur them korrupsioni, po mendoj në prokurimet publike, mitmarrjet, por edhe mosrespektimin e orarit nga ana e stafit mjekësor”, thotë Bajrami.

Sidoqoftë, sipas sekretarit permanent në Ministrinë e Shëndetësisë, tashmë disa padi janë përgatitur dhe lëndët pritet të dërgohen në organet kompetente./TopLajm

Postuar te KOSOVË. Komentet te >QKUK: Dyshime për korrupsion Janë të Mbyllura
Këtë e pëlqejnë %d blogues: