>Kaos në Bjellorusi

>

Presidenti autoritar i Bjellorusisë, Alexander Lukashenko
i fitoi qartë, siç pritej zgjedhjet presidenciale, duke marrë 79,67 për qind të votave, sipas rezultateve përfundimtare. Pas zgjedhjeve Minsku tronditet nga protestat.


Pas përfundimit të votimeve të dielën në mbrëmje, nisën protestat e mijëra ithtarëve të opozitës së bashku me disa prej kandidatëve presidencialë. Ata janë të mendimit se presidenti aktual Lukashenko i ka manipuluar zgjedhjet e djeshme presidenciale. Policia ndërhyri me mjete të dhunshme, si pasojë ka pasur mjaft të lënduar.


Ndërkohë u bë e ditur se presidenti bjellorus, Alexander Lukashenko i fitoi për herë të katërt një mandat presidencial në zgjedhjet e së dielës. Nëntë kandidatët konkurrentë të tij arritën vetëm rezultate njëshifrore.

Lukashenko është në pushtet që prej vitit 1994. Në zgjedhjet e fundit katër vjet më parë ai arriti të mbledhë 82,6 për qind të votave.

Lukashenko, që më parë ka qenë kryetar kooperative, pati paralajmëruar se do t’i mposhtte konkurentët e tij pa cenuar procesin elektoral. Por kritikët e akuzuan atë se kishte urdhëruar policinë që të arrestonte aktivistët e opozitës dhe e kishte detyruar medien e kontrolluar nga shteti që ta mbështesë.

Policia rreh opozitarëtPak para mbylljes së lokaleve të votimit të dielën, policia sulmoi me bomba tymosëse një grup aktivistësh të opozitës, që po ecnin në drejtim të Sheshit Tetori, sheshit qendror të Minskut. Grupin e drejtuar nga poeti Vladimir Neklajew e hodhën në borë dhe disa vetë u arrestuan. Një zëdhënës tha se Neklajevi 64 vjeçar u dërgua pas rrahjeve pa ndjenja në një spital, për të mjekuar plagët në kokë. Kritikë të qeverisë folën për manipulime të mëdha dhe kërkuan përsëritjen e zgjedhjeve, duke përjashtuar Lukashenkon. Anëtarë të grupit vëzhgues For Fair Elections thanë të dielën se autoritetet u kishin ndaluar hyrjen në zyra dhe përdorimin e telefonave, sepse ata u kishin dhënë intervista medieve të huaja. 


Lukashenko i pati ndaluar mbledhjet publike ditën e zgjedhjeve. “Çfarë presin mbështetësit e demonstratave të protestës? Lexoni ligjet tona”, tha Lukashenko.”Gjithçka do të jetë sipas ligjeve tona. Nuk ka për të pasur ndonjë demonstratë.”

Komisioni Qendror i Zgjedhjeve foli disa herë për pjesëmarrje të lartë në votime. Më shumë se 1000 vëzhgues ndërkombëtarë, të drejtuar nga një delegacion prej 490 anëtarësh të Organizatës Për Siguri dhe Bashkëpunim në Evropë vëzhguan zgjedhjet në Bjellorusi. Opozita kishte paralajmëruar paraprakisht se zgjedhjet do të manipuloheshin./gs


Postuar te Bota. Komentet Mbyllur te >Kaos në Bjellorusi
Këtë e pëlqejnë %d blogues: